Azərbaycanın Biləsuvar Gömrük İdarəsinin “QoşaTəpə”Gömrük Postunda İrandan Azərbaycana  narkotik keçirən iki qadın saxlanıldı.

Azərbaycanın gömrük orqanları 400 qramdan artıq narkotik vasitəni ölkə sərhədindən keçirmək istəyənbu iki qadının ana və qız olduğunu söyləyib.

Dövlət Gömrük Komitəsinin (DGK) Mətbuat Xidmətindən APA-ya verilən məlumata görə, fakt Biləsuvar Gömrük İdarəsinin Gömrük hüqüqpozmalarına qarşı mübarizə şöbəsinə daxil olmuş əməliyyat məlumatı əsasında Biləsuvar Gömrük İdarəsinin “Qoşa Təpə” Gömrük Postunda aşkar edilib.

İrandan Azərbaycana piyada gələn Azərbaycan Respublikası vətəndaşları Fəridə Şahsuvarova və Səyyarə Şahsuvarova saxlanılaraq onların üzərində müvafiq qanunvericiliyə uyğun olaraq şəxsi yoxlama aparılıb. Şəxsi yoxlama zamanı S. Şahsuvarovadan gömrük nəzarətindən gizlədilmiş uzunsov formalı bükümlərdə ümumi xalis çəkisi 149,038 qram narkotik vasitə – heroin və xalis çəkisi 3,971 qram psixotrop maddə – metamfetamin, F. Şahsuvarovadan isə ümumi xalis çəkisi 251,688 qram narkotik vasitə – heroin aşkar edilərək götürülüb.

Məlumatda qeyd edilib ki, F. Şahsuvarova S. Şahsuvarovanın anasıdır.

Faktla bağlı DGK-nın İstintaq İdarəsində zəruri istintaq tədbirləri və xüsusi araşdırmalar davam etdirilir.